Երևանի նորաձևության շաբաթն արդեն կայացած, քաղաքի հետ սերտ ասոցոցավող իրադարձություն է։ Այնպես որ թերևս զարմանալի չէ, քաղաքապետարանը աջակցում է նախագծին՝ ֆինանսավորելով է բյուջեի զգալի մասը, բայց մնացած մասը հայթայթելը մնում է ամենամեծ մարտահրավերը։ Վահանը անկեղծ է․ «Մեզ համար ամենաբարդը ֆինանսներ հայթհայթելն է։ Դեռ երրորդ տարին է, բայց մենք հստակ տեսնում ենք պոտենցիալը ու հավատում ենք, որ Երևանի նորաձևության շաբաթը կարող է դառնալ ռեգիոնալ մեծ իվենթ։ Ֆինանսներ ունենալու դեպքում նորաձևության շաբաթը պետք է լինի ոչ թե տարին մեկ, այլ երկու անգամ»։

Բացի հիմնական ցուցադրություններից, այս տարի նախատեսվում է նաև մի յուրահատուկ միջոցառում Ազգային պատկերասրահում։ Դիզայներները պիտի ընտրեն ոգեշնչման աղբյուր թանգարանի արվեստի գործերից և դրա հիման վրա ստեղծեն նոր հավաքածուներ։ Անցյալ տարի նմանատիպ նախագիծ նվիրված էր Փարաջանովին, իսկ այս անգամ այն լինելու է ավելի մասշտաբային ու բազմազան։ Այս ցուցադրությամբ էլ պաշտոնապես բացվելու է այս 2025-ի նորաձևության շաբաթը։

Արդեն երկրորդ տարին է, որ Երևանում անցկացվում է նաև Fashion Scout-ը, որի լիցենզիան Պալատը գնում է Լոնդոնից։ Սա հարթակ է երիտասարդ դիզայներների համար, որտեղ նրանք կարող են ցույց տալ իրենց աշխատանքները և հաղթելու դեպքում հնարավորություն ստանան ներկայացվելու հենց Լոնդոնի Fashion Week-ում։ «Երբ ես երիտասարդ էի, նման բան միայն երազանք կլիներ», — ասում է Վահանը։

Այս տարի մրցույթը նաև առանձնահատուկ հյուր ունի․ Իտալիայի հեղինակավոր Bolimoda դպրոցի տնօրենը և Ferragamo-ի նախկին գլխավոր դիզայները, լինելու է ժյուրիի նախագահ։ Նա էլ հենց կհայտարարի մրցանակը՝ ամառային դպրոցի կրթաթոշակ։

«Մենք ամեն տարի փորձում ենք նոր արժեք ավելացնել, ոչ միայն գեղեցիկ շոու անել։ Մեր նպատակը ինդուստրիայի զարգացումն է։ Ճիշտ է, երբեմն ուզում ենք մեծ, տպավորիչ շոուներ անել, բայց այս պահին մեր առաջնային խնդիրը ոլորտին օգնելն է, ոչ թե պարզապես հանդիսատեսին գոհացնելը»։

Դիզայներների վերաբերմունքն էլ տարիների ընթացքում փոխվել է։ Կայացածները մասնակցում են անկախ նրանից՝ կարիք ունեն թե ոչ, որովհետև գիտակցում են, որ սա երկրի համար կարևոր է։ Իսկ սկսնակները տեսնում են հեռանկար ու ձգտում ներգրավվել։ «Եթե կա ինդուստրիա, պետք է լինի նաև նորաձևության շաբաթ։ Ու պետք է լինի նաև մասնագիտական մամուլ։ Երբ Դալմայի ամսագիրը հայտնվեց, անկեղծորեն զգացի, որ մի մեծ քար ընկավ սրտիցս», — պատմում է նա։

Բոլոր նորեկներին Երևանի նորաձևության շաբաթվա կազմակերպիչը հորդորում է ակտիվ լինել, փորձել սեփական ուժերը, օգտագործել ընձեռնված հնաաարվորությունը, նպատակ դնել «Մենք կերազեինք ունենալ այն հնարավորությունները, որոնք ունի այս սերունդը»։ Ամեն դեպքում, մեր նորաձևության ոլորտը դեռ կայացման փուլում է։ Վահանն ասում է․ «Ցավոք դեռ չենք հասել այն հաջողություններին, որ ունեցել են, օրինակ, վրացիները կամ ուկրաինացիները։ Պատճառն այն չէ, որ մեր դիզայներները նրանցից պակաս տաղանդավոր են։ Պարզապես մեզ մոտ պակասում են երկու բան՝ PR-ը և բյուջեն։ Այսօր հենց դրանք են որոշում արդյունքը»։

Ըստ Վահանի՝ Վրաստանում պետությունը ճիշտ պահին մեծ ներդրումներ արեց նորաձևության ոլորտում, ու միանգամից ամբողջ աշխարհը սկսեց խոսել Թբիլիսիի մասին՝ որպես նորաձևության նոր կենտրոնի։ Հետո նույնը եղավ Ուկրաինայում։ Մեր հերթը դեռ չի հասել։ Բայց մենք այդ ճանապարհին ենք, անկասկած։